ကိုထွေး Friday, April 09, 2010 .အမျိုးသား ဒီမိုကရေစီ အဖွဲချုပ် (NLD) က စစ်အစိုးရအား တရားစွဲဆို ခဲ့ခြင်းကို ဥပဒေနှင့်အညီ ဆောင်ရွက်ပေးရန် တရားသူကြီးချုပ်ထံသို့ ယမန်နေ့က စာရေးသား ပေးပို့လိုက်သည်။
ပြဌာန်းလိုက်သည့် ၂၀၁၀ ရွေးကောက်ပွဲ ဆိုင်ရာ ဥပဒေများသည် တရားမျှတမှု မရှိသည့်အတွက် NLDက စစ်အစိုးရ ခေါင်းဆောင် ဗိုလ်ချုပ်မှူးကြီး သန်းရွှေကို မတ်လက တရားစွဲဆိုခဲ့သည်။
သို့သော်လည်း တရားရုံး တရားမဌာနမှ တာဝန်ရှိသူက“ကျမတို့၌ စီရင်ပိုင်ခွင့် မရှိ” ဟု ပြောဆိုပြီး အမှုတွဲကို ပြန်လည် ပေးအပ်ခဲ့သဖြင့် နေပြည်တော် တရားသူကြီးချုပ်ထံသို့ စာရေးသား ပေးပို့လိုက်ခြင်းဖြစ်သည်။
ရှေ့နေ ဦးဉာဏ်ဝင်းက “ဒီလို ငြင်းပယ်ခွင့်မရှိဘူး၊ ဒါဟာ ဥပဒေနဲ့ မညီဘူး၊ ငြင်းမယ်ဆိုရင် အကျိုးအကြောင်းဖော်ပြရမယ်၊ ဒါဟာ ပြဌာန်းချက်ရှိတယ်၊ အဲဒါကြောင့် ဥပဒေနဲ့အညီ ဆောင်ရွက်ပေးပါလို့ တရားသူကြီးချုပ်ကို တင်တာပါ”ဟု ပြောသည်။
ယခုကဲ့သို့ ဆောင်ရွက်ခြင်းသည် ဥပဒေနှင့် အညီဖြစ်ရန်အတွက် ဆောင်ရွက်ခြင်းဖြစ်ကြောင်း၊ အကယ်၍ လက်ခံခဲ့ပါက ဆုံးဖြတ်ချက်အပေါ်မူတည်၍ ဆက်လက်ဆောင်ရွက်သွားမည်ဖြစ်ပြီး ငြင်းပယ်ခဲ့ပါက ဥပဒေနှင့် ဆန့်ကျင် ဆောင်ရွက်ခြင်း ဖြစ်သည်ဟု သတ်မှတ်ရမည်ဖြစ်ကြောင်း ၎င်းကဆက်လက်ပြောဆိုသည်။
အစိုးရက မတ်လ ၈ ရက်နေ့တွင် ပြဌာန်းသည့် ရွေးကောက်ပွဲ ကော်မရှင် ဥပဒေ၊ နိုင်ငံရေး ပါတီများ မှတ်ပုံတင်ခြင်း ဥပဒေ၊ ပြည်သူ့လွှတ်တော် ရွေးကောက်ပွဲ ဥပဒေ၊ အမျိုးသားလွှတ်တော် ရွေးကောက်ပွဲ ဥပဒေ၊ တိုင်းဒေသကြီးလွှတ်တော် သို့မဟုတ် ပြည်နယ်လွှတ်တော် ရွေးကောက်ပွဲဥပဒေတို့ကို သုံးသပ်ကြည့်လျှင် “ဒီမိုကရေစီ ကျင့်စဉ်များ၊ လွတ်လပ်မှုများ၊ တရားမျှတမှုများ မရှိကြောင်းတို့ကို အထင်အရှား တွေ့မြင်နေရပါသည်” ဟု NLD ကဆိုသည်။
NLD ခေါင်းဆောင် ဒေါ်အောင်ဆန်းစုကြည်က အကျဉ်းကျခံနေရသူကို ပါတီဝင်ခွင့် မပေးခြင်းသည် လူ့အခွင့်အရေး ချိုးဖောက်မှု ဖြစ်ကြောင်း၊ ပြစ်ဒဏ်ကို ၂မျိုး ပေးသကဲ့သို့ ဖြစ်နေကြောင်း၊ ရွေးကောက်ပွဲနှင့် ပတ်သက်သော ဥပဒေများသည် ဤမျှ ဆိုးဆိုးဝါးဝါး ထွက်လာလိမ့်မည်ဟု မထင်ခဲ့ကြောင်း ရှေ့နေဖြစ်သူ ဦးဉာဏ်ဝင်းနှင့် တွေ့ဆုံစဉ် ပြောကြားခဲ့သည်ဟု သိရသည်။
NLDကရွေးကောက်ပွဲ ဥပဒေများကို ဥပဒေကြောင်းအရ ဆောင်ရွက်ရန် ကြိုးစားနေချိန်တွင် ရွေးကောက်ပွဲ ကော်မရှင်ထံသို့ နိုင်ငံရေးပါတီ ၄ ခုက ပါတီဖွဲ့ခွင့်ပြုရန် ထပ်မံ လျှောက်ထားကြောင်း ယနေ့ထုတ် အစိုးရပိုင် သတင်းစာတွင်ရေးသားထားသည်။
ပြည်ထောင်စု ဒီမိုကရေစီပါတီ၊ ရှမ်းတိုင်းရင်းသားများဒီမိုကရက်တစ်ပါတီ၊ တအောင်း(ပလောင်) အမျိုးသား ပါတီနှင့် ပြည်ထောင်စု ကရင်အမျိုးသားများ အဖွဲ့ချုပ်ပါတီတို့သည် ရွေးကောက်ပွဲကော်မရှင်ထံသို့ ထပ်မံလျှောက်ထားခဲ့သည့်အတွက် နိုင်ငံရေး ပါတီဖွဲ့ခွင့် ပြုရန်လျှောက်ထားသည့် ပါတီမှာ ၁၆ခု ရှိပြီဖြစ်သည်။
No comments:
Post a Comment