မျိုးချစ်သူ / ၀၇ စက်တင်ဘာ ၂၀၁၀
ပဲခူးမြို့တွင် စစ်သားများက သေနတ်ဖြင့်ပစ်ခတ်၍ ပွဲချင်းပြီး သေဆုံးခဲ့သည့်လူငယ် (၂) ဦး၏အလောင်းများကို ယနေ့ နေ့လယ် (၁၂) နာရီတွင် ပဲခူးမြို့ ဆင်ဖြူကွင်း သုသာန်တွင် သင်္ဂြိုဟ်ခဲ့သည်။
ပဲခူးမြို့ ပြည်သူ့ဆေးရုံကြီး ရင်ခွဲရုံတွင် သရဏဂုံတင်ကာ ယင်းသုဿန်သို့ ပို့ဆောင်သင်္ဂြိုဟ်ခဲ့ခြင်းဖြစ်ပြီး လိုက်ပါပို့ဆောင်သူ ပရိသတ် (၂,၅၀၀) ကျော်ခန့် ရှိမည်ဟု အသုဘ လိုက်ပါပို့ဆောင်ခဲ့သူတဦးက ပြောသည်။
အဆိုပါ အသုဘအခမ်းအနားတွင် (ပြည်သူကို ကိုက်တဲ့စစ်ခွေးအလိုမရှိ) ဟူသော စာများ ပျံ့နှံ့ခဲ့ကြောင်း၊ မည်သူက ဝေငှခဲ့သည်ကိုမူ မိမိတို့အနေဖြင့် မသိရှိကြောင်း အဆိုပါ အသုဘပို့ခဲ့သူက ပြောကြားသည်။
ပဲခူးမြို့ခံတဦးကမူ “ပဲခူးကြခတ်ဝိုင်းကျောင်းတိုက်က ဆရာတော်တပါးကို အလောင်းနားမှာ ကြပ်မတ်ပေးဖို့ စစ်တပ်က လျှောက်ထားခဲ့တယ်လို့ သိရတယ်။ အလောင်းကို လုပြေးကြမှာစိုးလို့တဲ့” ဟု ပြောသည်။
ယနေ့နံနက် (၉) နာရီခန့်ကပင် ပဲခူး ပြည်သူ့ဆေးရုံကြီး ရင်ခွဲရုံအနီးတွင် လူဦးရေ (၄၀၀) ခန့်ရှိသည့် လူအုပ်ကြီးက အလောင်းများ ထုတ်ယူလာသည်ကို စောင့်ကြည့်နေခဲ့ကြသည်ဟု သိရသည်။
“ကလေးတွေကို ကြည့်ချင်တဲ့သူတွေလည်းပါတယ်။ သေတဲ့အထဲမှာ အသက် (၁၉) နှစ်ရှိတဲ့ မောင်စိုးပိုင်ဇော်က ဗိုလ်သင်တန်း ဖြေထားတဲ့ ကောင်လေးလို့ သိရတယ်။ ကောင်လေး မိတ်ဆွေတွေကတော့ အများကြီးပဲ။ သူ့သူငယ်ချင်းတွေပေါ့။ အခု ကျနော်မှန်းကြည့်တာ လူအုပ်ကြီးက (၂,၅၀၀) ကျော်လောက်ရှိမယ်။ ဆေးရုံအရှေ့ဘက်အပေါက်ကနေ အနောက်ဘက်အပေါက်ထိ ကျုံးရိုးလမ်းမကြီးတလျှောက်မှာ ရှိနေတယ်” ဟု မျက်မြင် ပဲခူးမြို့ခံက ပြောသည်။
ပြီးခဲ့သည့်စက်တင်ဘာ (၆) ရက်နေ့ကပင် ပဲခူးမြို့တွင် ခလရ (၅၉) မှ စစ်ကားများနှင့် လုံထိန်းကားများကို အစောင့်များ ချထားခဲ့သည်။
“အများဆုံးကတော့ ဆေးရုံအနားမှာရော၊ ကျွန်းသာယာ အဝေးပြေးဂိတ်ကစပြီးတော့ ဇိုင်းဂနိုင်းရပ်ကွက်ထိကို နေရာအနှံ့ပဲ စစ်ကားတွေ၊ ရဲကားတွေ ချထားတယ်။ အခုလို လုံခြုံရေးချတာဟာ သေနတ်နဲ့ပစ်ခံရတဲ့ ကောင်လေးတွေကြောင့်ပဲလို့ ထင်တယ်” ဟု ပဲခူးမြို့ခံတဦးက ပြောသည်။
သေဆုံးသော လူငယ်(၂) ဦး၏အလောင်းများ မြေကျသည်နှင့် လူငယ်အများစုနှင့် ပြည်သူအချို့တို့က ပဲခူး ရွှေမောဓောစေတီသို့ သွားရောက်ဆုတောင်းခဲ့ကြကြောင်း မြို့ခံမျက်မြင်တဦးက ပြောကြားသည်။
“သင်္ဂြိုဟ်တာက (၁၂) နာရီကျော်မှာ မီးသင်္ဂြိုဟ်လိုက်တယ်။ ပဲခူးမြို့မှာတော့ အစည်ဆုံး အသုဘတခုပဲ” ဟု အသက် (၃၀) ခန့်ရှိသူ ဇိုင်းဂနိုင်းရပ်ကွက်သား ဘွဲ့ရလူငယ်တဦးက ပြောသည်။
လူငယ်များအလောင်းကို စစ်တပ်မှ ဦးစီးကျင်းပပေးခဲ့ပြီး ပဲခူးမြို့မှ ကြက်ခြေနီများက ၀ိုင်းဝန်းသယ်ဆောင်ပေးကာ သင်္ဂြိုဟ်ခဲ့ကြကြောင်း သိရသည်။
သေဆုံးသူ လူငယ်နှစ်ဦးမှာ ပဲခူးမြို့ ဇိုင်းဂနိုင်း တောင်ပိုင်း မြလမ်းတွင် နေထိုင်သူ မောင်စိုးပိုင်ဇော် အသက် (၁၉) နှစ်နှင့် မင်္ဂလာလမ်းတွင်နေထိုင်သူ မောင်အောင်သူဟိန်း အသက် (၂၃) နှစ်တို့ဖြစ်ကြသည်။
အဆိုပါ လူငယ် (၂) ဦးအပါအ၀င် လူငယ်တို့သည် ခြေလျင်တပ်ရင်းအမှတ် (၅၉) မှ အရာရှိဖြစ်သူနှင့် ခိုက်ရန်ဖြစ်ပွားခဲ့ရာမှ စက်တင်ဘာ (၅) ရက်နေ့ နံနက်ပိုင်းတွင် ထိုစစ်တပ်မှ စစ်သားက သေနတ်ဖြင့်ပစ်ခတ်သောကြောင့် ပွဲချင်းပြီး သေဆုံးခဲ့ခြင်းဖြစ်သည်။
Copyright © 1992-2010 The New Era Journal :::
No comments:
Post a Comment