အန်အယ်လ်ဒီ ရပ်တည်ရေး စီအာပီပီအဖွဲ့ဝင်များ စည်းဝေး

NEJ/ ၄ မေ ၂ဝ၁ဝ


ပြည်သူ့လွှတ်တော်ကိုယ်စားပြုကော်မတီ (စီအာပီပီ) အဖွဲ့ဝင်များသည် အမျိုးသားဒီမိုကရေစီအဖွဲ့ချုပ် (အန်အယ်လ်ဒီ) ရုံးချုပ်တွင် ယနေ့နေ့လယ်ပိုင်း၌ အစည်းအဝေးတရပ် ကျင်းပခဲ့သည်ဟု စီအာပီပီအတွင်းရေမှူး ဦးအေးသာအောင်က ပြောကြားသည်။

“အစည်းအဝေးမှာ အဓိကထားဆွေးနွေးတာကတော့ နအဖရဲ့ ပါတီမှတ်ပုံတင်ဥပဒေအရ ရက်ပေါင်း (၆၀) ဆိုရင် ပါတီဟောင်းတွေက ပါတီမှတ်ပုံတင်ဖို့ သက်တမ်းကုန်ဆုံးမှာဖြစ်ပါတယ်။ အဲဒီနောက်ပိုင်းမှာ အန်အယ်လ်ဒီ ဘယ်လို ရပ်တည်မလဲ၊ ရှေ့ဆက်ပြီးတော့ နိုင်ငံရေးခရီးကို ဘယ်လိုလျှောက်မလဲဆိုတာကို ဆွေးနွေးကြတာပါ” ဟု ၎င်းက ပြောသည်။

အစည်းအဝေးသို့ ဒု-ဥက္ကဋ္ဌ ဦးတင်ဦး၊ ဗဟိုအလုပ်အမှုဆောင်များဖြစ်သည့် ဦးဝင်းတင်၊ ဦးခင်မောင်ဆွေတို့ အပါအ၀င် အန်အယ်လ်ဒီပါတီမှ (၇) ဦးတက်ရောက်ပြီး တိုင်းရင်းသားပါတီများမှ မွန်အမျိုးသားဒီမိုကရေစီအဖွဲ့ဥက္ကဋ္ဌ နိုင်ထွန်းသိန်း၊ ဇိုမီးအမျိုးသားကွန်ဂရက် ဥက္ကဋ္ဌ ဦးပူကျင့်ရှင်းထန်၊ ရခိုင်အမျိုးသားဒီမိုကရေစီအဖွဲ့ချုပ် တွဲဖက်အထွေထွေအတွင်းရေးမှူး ဦအေးသာအောင်၊ ပြည်ထောင်စုတိုင်းရင်းသားလူမျိုးများ ဒီမိုကရေစီအဖွဲ့ချုပ်မှ ဦးထောင်ကိုထန်းနှင့် အခြားစီအာပီပီ အဖွဲ့ဝင်နှစ်ဦးဖြစ်သည့် ပြည်သူ့လွှတ်တော်ကိုယ်စားလှယ် ဦးစိုးဝင်းနှင့် ဦးသိန်းဖေတို့လည်း တက်ရောက်ကြောင်း သိရသည်။

အန်အယ်လ်ဒီ ဒု-ဥက္ကဋ္ဌ ဦးတင်ဦးက “ကျနော်တို့က ပြီးခဲ့တဲ့ကိစ္စလေးတွေလည်း ဆွေးနွေးတယ်ပေါ့ဗျာ။ နောက်ပြီးတော့ ရှေ့ဘယ်လိုဆက်သွားမယ်ဆိုတာလည်းပဲ ဆွေးနွေးပါတယ်။ စီအာပီပီဟာ ပြည်သူ့လွှတ်တော်ကိုယ်စားလှယ်များနှင့် ဖွဲ့စည်းထားတာဖြစ်တယ်။ ၁၉၉၀ ရွေးကောက်ပွဲတုန်းကလည်း လွှတ်တော်ကိုယ်စားလှယ်တွေနဲ့ အမျိုးသားဒီမိုကရေစီ အဖွဲ့ချုပ်က ရကြတယ်။ အဲဒီအပေါ် လွှတ်တော်ပေါ်လာရေးအပေါ် အကြောင်းပြုပြီးတော့ လွှတ်တော်ကိုယ်စားပြုကော်မတီ ဖွဲ့ထားတာဖြစ်တဲ့အတွက်ကြောင့် ရှေ့ဆက်ပြီးတော့လည်း ကျနော်တို့အလံတို့ ဆိုင်းဘုတ်တို့ မရှိငြားသော်လည်းပဲ စိတ်ဓာတ်နဲ့ ပတ်သက်ပြီးတော့ ဆောင်ရွက်စရာရှိတဲ့ ကိစ္စများအားလုံးကို ဆက်လက်ပြီးတော့ ကိုယ့်နည်းကိုယ့်ဟန်နဲ့ ဆက်သွယ်ပြီးတော့ အခြေအနေများကို လေ့လာသုံးသပ်ပြီးတော့ အခါအားလျှော်စွာ ညှိနှိုင်းတိုင်ပင်ပြီးတော့ ဆောင်ရွက်စရာကိစ္စများကို ဆောင်ရွက်ဖို့ဆိုတာနဲ့ ရပ်တည်နေကြဖို့ ဆွေးနွေးတာပါ” ဟု ခေတ်ပြိုင်သို့ ပြောကြားသည်။

ပါတီမှတ်ပုံတင်ကန့်သတ်ရက် ရက်ပေါင်း (၆၀) ကျော်သွားသော်လည်း အဖွဲ့ချုပ်၏ ဆိုင်းဘုတ်နှင့်အလံတို့ကို မဖြုတ်ဘဲ ဆက်လက်ထားရှိမည်ဟု ၎င်းက ပြောသည်။

“ကျနော်တို့ကိုယ်တိုင် ဆိုင်းဘုတ်တို့ အလံတို့ကို ချမှာမဟုတ်ဘူးလေ။ ရုံးအထဲမှာရှိတဲ့ ပစ္စည်းတွေကိုတော့ ပါတီအဖွဲ့အစည်းတရပ်အနေနဲ့ မရှိတော့ဘူးဆိုတဲ့ သဘောပေါက်ပြီးတော့ စာရွက်စာတမ်းတွေကို ကျနော်တို့ သိမ်းဆည်းထားမယ်ပေါ့။ သို့သော်လည်း ကျနော်တို့ အဖွဲ့ဝင်များအနေနဲ့က အဖွဲ့ဝင်သဘောတော့ မဟုတ်သော်ငြားလည်း ကျနော်လုပ်ကိုင်လာတဲ့ အဖွဲ့ချုပ်ရဲ့စိတ်ဓာတ်နဲ့ ပတ်သက်တဲ့ဟာတွေကတော့ ပျောက်ပျက်သွားမှာလည်းမဟုတ်ဘူး။ အစဉ် ရပ်တည်ပြီးတော့ ရှိနေမှာဖြစ်တယ်” ဟု ဦးတင်ဦးက ပြောသည်။

အဖွဲ့ချုပ်၏ လုပ်ငန်းကိစ္စများကိုမူ အဖွဲ့ချုပ်တရပ်အနေဖြင့် လုပ်ဆောင်မည်မဟုတ်ကြောင်း၊ သို့သော် တိုင်းရင်းသား လွှတ်တော်ကိုယ်စားလှယ်များ ပါဝင်သည့် စီအာပီပီကလည်း ရှိနေဦးမည်ဖြစ်သည့်အတွက် အခါအားလျှော်စွာ ညှိနှိုင်း ဆွေးနွေးသွားမည်ဟု ၎င်းက ဆက်လက်ပြောသည်။

“သို့သော်လည်းပဲ အခါအားလျော်စွာ အခြားသင့်တော်တဲ့ နေရာတနေရာမှာဖြစ်စေ တွေ့ဆုံပြီး ကျနော်တို့ လွှတ်တော်ကိုယ်စားပြုကော်မတီဆိုတဲ့ အမည်နာမနဲ့ မဟုတ်ငြားသော်လည်းပဲ အဲဒီစိတ်ဓာတ်နဲ့ တိုင်းရေးပြည်ရာ ကိစ္စရပ်နဲ့ ပတ်သက်လို့ နိုင်ငံရေးကိစ္စအ၀၀ကိုလည်း ညှိနှိုင်းဆွေးနွေးပြီး အခါအားလျှော်စွာ ကျနော်တို့သဘောထားတွေနဲ့ ပတ်သက်တဲ့ အကြောင်းချင်းရာတွေကို ဆွေးနွေးတိုင်ပင်ဆောင်ရွက်သွားမယ်ဆိုတဲ့ ကိစ္စလေးတွေကို ညှိနှိုင်းပါတယ်။ အေးအေးချမ်းချမ်းနဲ့ ပြေပြေပြစ်ပြစ်နဲ့ တတ်နိုင်သလို လုပ်မယ်ဆိုတဲ့ကိစ္စရပ်တွေကို ဘယ်ပုံဘယ်နည်းလုပ်ကြမယ်၊ တဖွဲ့နဲ့တဖွဲ့ တယောက်နဲ့တယောက် ဆက်သွယ်တဲ့ကိစ္စတွေမှာလည်း အခါအားလျှော်စွာ ဆက်သွယ်ညှိနှိုင်း လုပ်ဆောင်သွားမယ်ဆိုတာကို ကျုယ်ကျယ်ပြန့်ပြန့်ဆွေးနွေးတာပါပဲ” ဟု ဦးတင်ဦးက ရှင်းပြသည်။

၎င်းက ဆက်လက်ပြီး “သဘောကတော့ဗျာ စိတ်ဓာတ်ကတော့ ရှိနေမယ်၊ စိတ်ဓာတ်ပေါ် မူတည်ပြီးတော့ကာ ကျနော်တို့ လုပ်စရာကိုင်စရာရှိတဲ့ ကိစ္စများကိုတော့ အေးအေးချမ်းချမ်း ငြိမ်းငြိမ်းချမ်းချမ်းနဲ့ တတ်နိုင်သလောက် လုပ်နိုင်တဲ့ အခြေအနေအတွင်းကနေ လုပ်ကိုင်သွားဖို့ဟာအတွက်ကို ညှိနှိုင်းတာပါပဲ။ အမည်တို့ဘာတို့ကတော့ အရေးမကြီးပါဘူး။ အရေးကြီးတာက စိတ်ဓာတ်နဲ့ဆက်လက်ရှင်သန်နေဖို့ဆိုတဲ့ ကိစ္စကိုပဲ ရပ်တည်ဆောင်ရွက်သွားမယ်ဆိုတဲ့သဘောပါ” ဟု ပြောဆိုသည်။

ပြည်သူ့လွှတ်တော်ကိုယ်စားပြုကော်မတီ (စီအာပီပီ) ကို ၁၉၉၀ ပြည့်နှစ် ပါတီစုံဒီမိုကရေစီအထွေထွေရွေးကောက်ပွဲက တင်မြောက်လိုက်သည့် ပြည်သူ့လွှတ်တော်ကို ကိုယ်စားပြုပြီး ၁၉၉၈ ခု စက်တင်ဘာ (၁၆) ရက်တွင် တရားဝင်ဖွဲ့စည်းခဲ့သည်။


::: Copyright © 2004 The New Era Journal :::