ကျော်ခ | အင်္ဂါနေ့၊ ဇန်နဝါရီလ ၂၆ ရက် ၂၀၁၀ ခုနှစ် ၁၅ နာရီ ၅၇ မိနစ် .
မဇ္ဈိမ (ချင်းမိုင်) ။ ။ အကျဉ်းကျနေသည့် နိုင်ငံကျော် ဟာသသရုပ်ဆောင် ကိုဇာဂနာ၏ မနက်ဖြန် ကျရောက်မည့် ၄၉ နှစ်မြောက် မွေးနေ့တွင် “ဆေးရောင်စုံအငြိမ့်သဘင်” အဖွဲ့သားများက ထိုင်းနိုင်ငံ ချင်းမိုင်မြို့၌ ဆွမ်းကပ်ဆုတောင်းပွဲ ပြုလုပ်မည်ဟု သိရသည်။
မြန်မာနိုင်ငံနှင့် နယ်ချင်းကပ် ချင်းမိုင်မြို့ရှိ “ဝပ်ဆိုင်မွန်း” မြန်မာဘုန်းတော်ကြီးကျောင်း၌ လူရွှင်တော် ဂေါ်ဇီလာ ခေါင်းဆောင်သည့် သီးလေးသီး “ဆေးရောင်စုံ အငြိမ့်သဘင်” အဖွဲ့သားများက ကိုဇာဂနာ မွေးနေ့တွင် သံဃာတော်များကို ဆွမ်းကပ်၍ ဆုတောင်းပွဲ ပြုလုပ်ရန် စီစဉ်ထားခြင်း ဖြစ်သည်။
“ကျနော်တို့ ဆရာ ကိုဇာဂနာ အပါအဝင် ကိုယ်ကျိုးစွန့်ပြီး တိုင်းပြည်အတွက် အနစ်နာခံနေတဲ့ နိုင်ငံရေး အကျဉ်းသားများ အားလုံး အချုပ်နှောင်ခံဘဝမှ အမြန်ဆုံး လွတ်မြောက်ပါစေဆိုပြီး မနက်ဖြန် ၁ဝ နာရီမှာ သီးလေးသီးအဖွဲ့သားတွေက ဆွမ်းကပ် ဆုတောင်းပွဲ လုပ်မှာပါ” ဟု အဖွဲ့ခေါင်းဆောင် လူရွှင်တော် ကိုဂေါ်ဇီလာက မဇ္ဈိမကို ပြောသည်။
၁၉၈၇ ခုနှစ်တွင် မြပုဏ္ဏမာအငြိမ့်ကို ကိုဇာဂနာ၊ အရိုင်းတို့က စတင်တည်ထောင်ခဲ့ပြီး နောက်ပိုင်းတွင် ကင်းကောင်၊ ဖိုးဖြူ ၊ဌက်ပျောကြော်၊ ဂေါ်ဇီလာတို့ ပါဝင်လာခဲ့၍ အစိုးရအား ထောက်ပြသရော်သည့် ပြက်လုံးများ ရဲဝံ့စွာ ထုတ်ဖော် တင်ဆက်ခဲ့ကြသည်။
ထို့နောက် ၂ဝဝ၅ ခုနှစ်တွင် မြပုဏ္ဏမာ၏ မျိုးဆက်သစ်အဖြစ် သီးလေးသီး ဆေးရောင်စုံ အငြိမ့်သဘင်ကို စတင်၍ လက်ဆင့်ကမ်း ပွဲထုတ်ပေးခဲ့သည်။
“သီးလေးသီး” ကို ဂေါ်ဇီလာ၊ စိန်သီး၊ ကြယ်သီး၊ ပန်းသီး၊ ဇီးသီးနှင့် မင်းသမီး ချောစုမျိုး၊ မြစံပယ်ငုံတို့ဖြင့် ဖွဲ့စည်းထားပြီး ၂ဝဝ၈ ခုနှစ်မှ စတင်၍ ထိုင်းနိုင်ငံ အပါအဝင် နိုင်ငံတကာ၌ လှည့်လည်ဖျော်ဖြေနေကြသည်။
နာမည်ကျော် စွယ်စုံ အနုပညာရှင် ဇာဂနာ (ကိုသူရ) သည် ဆိုင်ကလုန်းမုန်တိုင်း ဒုက္ခသည်များကို ကူညီနေစဉ် ၂ဝဝ၈ ခုနှစ် ဇွန်လတွင် အာဏာပိုင်များ၏ ဖမ်းဆီးခြင်းကို ခံခဲ့ရသည်။
၂ဝဝ၈ ခုနှစ် နိုဝင်ဘာလ၌ အင်းစိန်ထောင်တွင်းခရိုင်တရားရုံးက အီလက်ထရောနစ် အက်ဥပဒေ အပါအဝင် အမှုပေါင်း ၈ မှုဖြင့် စွဲဆိုကာ သူ့အား ထောင်ဒဏ် ၅၉ နှစ်ချမှတ်ခဲ့သည်။ ပြီးခဲ့သည့်နှစ် ဖေဖော်ဝါရီလ ၁၃ ရက်နေ့တွင် တိုင်းတရားရုံးက အီလက်ထရောနစ် ဥပဒေ ပုဒ်မ ၃ ခုမှ တမှုလျှင် ၈ နှစ်စီဖြင့် ၂၄ နှစ် လျှော့ပေးခဲ့သဖြင့် ၃၅ နှစ်သာ ကျန်တော့သည်။
ကိုဇာဂနာသည် အပြင်၌ ရှိစဉ်ကလည်း မွေးနေ့အတွက် သံဃာတော်များအား ဆွမ်းကပ်လှူခြင်းသာ ပြုလုပ်လေ့ရှိကြောင်း ကိုဇာဂနာ၏ ခယ်မဖြစ်သူက ပြောသည်။
“ကျမတို့တော့ ထွေထွေထူးထူးတော့ မရှိဘူး။ သူလည်း မရှိတော့လေ။ အရင် သူရှိတုန်းကတော့ မနက်ပိုင်း ကုသိုလ်ကောင်းမှု လုပ်တတ်တယ်။ သံဃာတော်တွေကို ဆွမ်းကပ်တာပေါ့။ ပြီးရင် မိသားစုတွေ အကုန်လုံး ညနေစာ သွားစားကြတယ်” ဟု သူက မဇ္ဈိမကို ပြောသည်။
ထောင်တွင်း၌လည်း နိုင်ငံရေး အကျဉ်းသားများအနေဖြင့် မွေးနေ့ပွဲ ကျင်းပခွင့်မရဘဲ ကျင်းပကြောင်း သိရှိပါက “တိုက်ပိတ်” ခံရတတ်သဖြင့် တိတ်တဆိတ် လျှို့ဝှက်စွာ ပြုလုပ်ကြရကြောင်း သိရသည်။
မြန်မာနိုင်ငံအနှံ့ အကျဉ်းထောင်များတွင် ယုံကြည်ချက်ကြောင့် ချုပ်နှောင်ခံထားရသူ ဦးရေ ၂၁၀၀ ကျော်ရှိကြောင်း ထိုင်းနိုင်ငံအခြေစိုက် နိုင်ငံရေးအကျဉ်းသားများ ကူညီစောင့်ရှောက်ရေး အသင်း (မြန်မာနိုင်ငံ) AAPP-B က စာရင်းထုတ်ပြန်ထားသည်။
(ကိုဝိုင်း တည်းဖြတ်သည်။)
No comments:
Post a Comment